Biblioteka Nashonal Kòrsou durante di Covid-19 a adaptá i upgrade  su servisionan na públiko.

Den luna di aprel BNK a introdusí buki digital (e-books) riba su wèpsait www.bnkcuracao.com. Danki na koperashon di outornan lokal manera Diana Lebacs, Loekie Morales, Denise de Jongh-Rekwest, Jenny Coffie – Alberto, Natasha van der Dijs, Marlon Winedt, Hilda de Windt – Ayoubi, Roselyn Jobse – Jessurun, Laura Quast, Ariadne Farries i Mila Dorothea ku nos por a lográ pone esakinan na disposishon di un i tur kompletamente grátis. Durante di 1 luna mas ku 5000 persona a lesa e bukinan aki.

Den luna di aprel tambe a lansa lesamentu na muchanan. Kaminda un persona ta lees voor  un kuenta na e muchanan. E videonan ta disponibel riba Facebook di Biblioteka Nashonal Kòrsou i riba YouTube. Nos a risibí koperashon tambe di Tio Ali ku tur mainta tabata konta un kuenta, poesia i/òf kanta ku e muchanan. Mercee Doran tambe a duna un tremendo aporte kaminda nos di BNK por a kompartí su imágennan di kuenta pa un i tur.

Den luna di mei BNK den estrecho koperashon ku Koninklijke Bibliotheek a presentá ThuisBieb. ThuisBieb ta un sistema digital pa por fia buki(e-books) i lesa esakinan na kas. E servisio aki tabata aksesibel te ku 30 di mei kompletamente grátis pa un i tur por a lesa.

Na fin di luna di mei BNK den estrecho koperashon ku Koninklijke Bibliotheek a lansa su servisio di fia buki online. Tur persona ku ta deseá di hasi esaki mester ta miembro di BNK pa por apliká pa e opshon. BNK a risibí diferente petishon pa e opshon aki i nos klientenan ta lesando for di e servisio nobo.

Dia promé di yüni BNK a kuminsá habrí tiki tiki pa klientenan por fia buki bèk (hardcopy). E promé simannan di yüni nos lo kuminsá ku e servisio di “pick-up”. Tur kliente ku ta deseá por hasi nan petishon di buki online via di nos katálogo www.bnk.cw òf por email nos na dv@bnkcuracao.com pa mas informashon.

E motibu pa kual BNK ta bai kuminsá ku pick-up i no habri pa tur hende drenta, ta ku nos a enkontrá ku algun difikultat tekniko. Un di esakinan ta nos sistema di ventilashon. Esaki sigur ta importante pa por kumpli ku e eksigensianan durante di Covid-19. I pa e motibu aki BNK lo no por habri su portanan pa klientenan por hasi uso di kòmpiuter, buska buki den kashi i/òf otro servisionan ku nos ta ofresé.

Pa entrega di buki por hasi uso di nos Buzon di buki na entrada (na lado di Waaigat). Bukinan lo bai den “quarantaine” pa un periodo di 72 ora promé ku nan drenta kolekshon di BNK bèk. Esaki sigur den kuadro di Covid-19.

Den e lunanan yüni i yüli 2020 BNK tin su tarifanan na un preis mas abou pa stimulá mas persona pa bira miembro di BNK i hasi uso di e servisio nobo. Preis 0 – 12 aña gratis, 13 – 17 aña ta Fl. 2,-, 18 – 24 aña ta Fl. 10,-, 25 – 59 aña ta Fl. 22,-,   60+ aña ta Fl. 10,-.

BNK sigur ta trahando riba e Biblioteka di futuro. Un Biblioteka mas aksesibel ku sistemanan moderno, atraktivo i mas di fokus riba enseñansa i formashon. Pa asina por kontribuí ku e informashon konfiabel na un i tur.

Pa mas informashon por tuma kontakto ku BNK via Facebook Biblioteka Nashonal Korsou, wèpsait www.bnkcuracao.com, e-mail dv@bnkcuracao.com of Whats app nos via +5999-670-5719.