WILLEMSTAD:  Resientemente Digicel Kòrsou a firma un akuerdo ku Biblioteka Nashonal Kòrsou (BNK) pa durante 3 aña konsekutivo patrosiná e kompra di un kantidat di buki. Digicel konhuntamente ku BNK tin algun luna trahando riba e plan, kual a keda inspirá den Siman di Buki 2019. E bukinan keda usá den e proyekto di “Voorlezen “ na momentu ku BNK bishitá skolnan rònt Kòrsou pa stimulá lesamentu di buki serka e muchanan. Tambe, Digicel a hasi posibel pa BNK risibí algun unidat MiFi, di manera ku BNK por ‘live stream’ for di e klasnan ku nan ta bishitá.

Ku e konekshon aki BNK por bai den vários bario di Kòrsou i eduká mayor i mucha kon pa aksesá e wèpsait di BNK pa lesa buki grátis online i tambe kon pa bira miembro i fia buki online”.

E akuerdo ku Biblioteka Nashonal Kòrsou ta enserá un donashon pa e kompra di 180 buki pa mucha, repartí den 60 buki pa aña, durante 3 aña konsekutivo. Biblioteka Nashonal Korsou ke gradisi Digicel pa su gran aporte na stimulashon di lesamentu den nos pais.

Riba e imagen por tuma nota di Jeannine Bakhuis lider di e proyektonan di Ban Lesa di BNK huntu ku Arthur Tholel Relashonista Publiko di BNK i Aively Alejandra di Digicel.