WILLEMSTAD:  Resientemente Digicel Kòrsou a kumpli ku e di dos aña di akuerdo ku a firmá ku Biblioteka Nashonal Kòrsou (BNK) pa durante 3 aña konsekutivo patrosiná e kompra di un kantidat di buki. Digicel konhuntamente ku BNK tin awor algun tempu trahando riba diferente plan di promoshon di lesamentu. E bukinan keda usá den e proyekto di “Voorlezen “ na momentu ku BNK bishitá skolnan, krèshnan, “opvang”nan rònt Kòrsou pa stimulá lesamentu di buki serka e muchanan. Tambe, Digicel a hasi posibel pa BNK risibí algun unidat MiFi, di manera ku BNK por ‘live stream’ su diferente proyektonan na benefisio di e komunidat.

 Ku e konekshon aki BNK por realisá su proyekto “Biblioteka ku servisio nobo, pafó, i mas serka di bo” den bario nan di Kòrsou i eduká/informá mucha, mayor i hende grandi kon pa aksesá e wèpsait di BNK pa lesa buki grátis online i tambe kon pa bira miembro gratis i fia buki i revista online”.

 E akuerdo ku Biblioteka Nashonal Kòrsou ta enserá un donashon pa e kompra di 180 buki pa mucha, repartí den 60 buki pa aña, durante 3 aña konsekutivo. Biblioteka Nashonal Korsou ke gradisi Digicel pa su gran aporte na stimulashon di lesamentu den nos pais.

Riba e imagen por tuma nota d.r.p.d. sr. Arthur Tholel (PR di BNK), sra. Juraine Balentina (Digicel), sr. Mc Monti (Digicel Influencer), sra. Aively Albertus (Digicel) i sra. Jeannine Bakhuis (lider di e proyektonan di Ban Lesa di BNK) huntu ku Arthur Tholel Relashonista Públiko di BNK i di Digicel.