Kòrsou, 6 di yüni 2021

Biblioteka Nashonal Kòrsou ta kuminsá djaluna 7 di yüni ku su pòp-òp biblioteka. Ku servisio na skol i den bario.  

Durante di e pòp-òp aki Biblioteka ta bai ofresé diferente servisio i alabes ta bai tin seshon nan di interakshon ku personal di Biblioteka. Algun di e servisionan ku ta bai keda duná den bario ta: fiamentu di buki den bario (un sistema di bestel online i entregá ora nos ta den e bario), konsientisá i stumulá mas uso di buki digital (Online Bibliotheek), konsientisá e importansia di ta miembro di Biblioteka i por entregá buki di biblioteka bèk serka nos.

Algun di e servisionan na skol i kas di hende grandi ta; “Voorlezen”, kushinamentu ku lèter kreando palabra, kombersashon i interakshon tokante diferente topiko aktual i pasado, importansia di un biblioteka i su servisionan, presentashon i demonstrashon di video i musiká lokal saká for di nos Dokumento Nashonal.

Skema di e promé siman ta: djaluna 7 di yüni di 16:00 – 18:00 na Sentro di bario Papaya, djamars 8 di yüni di 14:00 – 16:00 na Grand Hill Curaçao Janwe, djárason 9 di yüni di Sentro di bario Montaña di 15:30 – 17:00, djaweps 10 di yüni di 9:00 – 11:00 na Sentro di bario Soto, djaweps 10 di yüni di 15:00 – 16:30 na Fundashon Amigunan di Kristu Fuik, djabièrnè 11 di yüni di 14:00 – 16:00 na Sentro di bario Otrobanda.

Biblioteka ta kuminsá ku su merkado  literario for di 9 di yüni di 1or pa 5or di atardi di djárason te ku djabièrnè, i djasabra di 10’or di mainta te ku 2’or di mèrdia. Durante di e merkado literario aki lo bende buki segunda mano, riba djasabra nos tin tambe algun mobilario segunda mano na benta. Bukinan di mucha ta Fl. 1,- i adulto Fl. 2,-. Por bini ku kaha òf saku di súpermerkado i asina probechá di bai ku esaki na Fl. 10,- òf Fl. 15,-.

Instansianan ku ta deseá un bishita di nos koleganan di BNK por tuma kontakto ku nos na 841-BOOK (2665) tst 253, òf +5999526-0105 of email nos na lesa@bnkcuracao.com pa mas informashon.

Klientenan ku ta deseá mas informashon por akudi riba nos pagina www.bnkcuracao.com òf por email nos na dv@bnkcuracao.com of app nos na +5999-6705719 por yama nos tambe na 841-BOOK (2665) tst 209.

Biblioteka ku servisio nobo, pafó, i mas serka di bo!