Biblioteka Nashonal Kòrsou a lansa ayera 7 di yüni su servisio di pòp-òp den bario di Seru Papaya.

Durante di e enkuentro aki nos koleganan a duna demonstrashon kon bira miembro di BNK, kon pa lesa buki digital riba www.bnkuracao.com i nos “Online Bibliotheek” ku mas di 28.000 buki na Hulandes.

Muchanan por a praktiká lesa riba laptop i skucha kuenta serka nos kolaboradornan.

Skema di e promé siman ta: djaluna 7 di yüni di 16:00 – 18:00 na Sentro di bario Papaya, djamars 8 di yüni di 14:00 – 16:00 na Grand Hill Curaçao Janwe, djárason 9 di yüni di Sentro di bario Montaña di 15:30 – 17:00, djaweps 10 di yüni di 9:00 – 11:00 na Sentro di bario Soto, djaweps 10 di yüni di 15:00 – 16:30 na Fundashon Amigunan di Kristu Fuik, djabièrnè 11 di yüni di 14:00 – 16:00 na Sentro di bario Otrobanda.

Biblioteka ta kuminsá ku su merkado  literario for di 9 di yüni di 1’or pa 5’or di atardi di djárason te ku djabièrnè, i djasabra di 10’or di mainta te ku 2’or di mèrdia. Durante di e merkado literario aki lo bende buki segunda mano, riba djasabra nos tin tambe algun mobilario segunda mano na benta. Bukinan di mucha ta Fl. 1,- i adulto Fl. 2,-. Por bini ku kaha òf saku di súpermerkado i asina probechá di bai ku esaki na Fl. 10,- òf Fl. 15,-.

Instansianan ku ta deseá un bishita di nos koleganan di BNK por tuma kontakto ku nos na 841-BOOK (2665) tst 253, òf +5999526-0105 of email nos na lesa@bnkcuracao.com pa mas informashon.

Klientenan ku ta deseá mas informashon por akudi riba nos pagina www.bnkcuracao.com òf por email nos na dv@bnkcuracao.com of app nos na +5999-6705719 por yama nos tambe na 841-BOOK (2665) tst 209.

Biblioteka ku servisio nobo, pafó, i mas serka di bo!